සැමියෙකුගේ උරුමය

අම්මට බෙහෙත් 
තාත්තට පත්තරය, බුලත්
නංගිට ටියුෂන් පීස්
බිරිදට සාරි ෂොපින්
දුවට සෙල්ලම් බඩු
මට.........
මාසෙ අවසානෙට 
කඩේ බිල, විදුලි බිල 
රැවුම්, ගෙරවුම්, බැනුම්
විඩාව..........

මතකය

අනාගත ප්‍රාර්ථනා 
සිත පතුලේ 
සත්මහල් ප්‍රාසාද 
ගොඩනගද්දී
ජිවිතයේ යථාර්තය 
වැටහුණ දිනක 
මගේමයි කියල
ලෝකයක් පටන් ගන්නට 
ඔබ වෙත පැමිණියත්......
ජීවිතය පුරාවට 
මගේමයි කියල සිතුව ඔබ
මගෙම විතරක් නෙවෙයිලු 
අනේ........ 
සැදූ ප්‍රසාද කදුලින් 
දියවී බිද වැටුනා මා දෙපාමුල 
හිත් පිත් නැතිවම......  

අප්පච්චී

අලුත් ඇදුම් ඕන කියලා 
මහා හයියෙන් හැඩුව දිනේ
ඔබ හැඩුවේ ඇයිද කියලා
හිතන්න මම පුංචි  වැඩියි...........

මහ අව්වේ ගල් කඩලා 
අත් වල ලේ ගැට පිරිලා
මම ඒ ගැන ඇහුවත් ඔබ 
අහිංසකව සිනාසුනා........

අම්මා අතේ තෙල් ගාද්දී 
මම ඔබ අසලින් ඉදගෙන
දෑසෙ ගලන කදුළු බිංදු
පිස දැමුවා මතකයි  තව........

එදා   නොතේරුනත් මෙදා 
දැනෙනවා ඒ හැම දෙයක්ම 
අද මා  එය මතක් කළේ
ඔබ හඩවන්න නම් නොවේ........

විභාගය

තාරුකා මල් පවා 
මලානිකව දිදුලන 
මේ පලු රාත්‍රියේ 
දෑත දිගු කර 
ඈනුම් අරිම්.........
මගෙ නෙත නිදිබරයි
ගතට හරි වෙහෙසයි
එහෙත් පෙනෙන තෙක් මානයේ 
විභාගය...... විභාගය......
නිරතුරුව මා 
අවදි කොට තබයි...... 

සොඳුරු මන්දාරම

තිළිණයකි ජිවිතයෙ මා ලද 
වසන්තයක් වූ සොඳුරු සරසවි වරම 
චංචල කරමින් නිසසල දිවියම
ගත කළ කෙළිලොල් ඒ සමය 
දිවියේ සොදුරු මන්දාරම විය

චන්ඩ මාරුත මේඝ හමුවේ 
රුවන් දිස්නය අඩු නොවන ලෙස
ලස්සන එදවස් මැකී නොයනු ඇත
දිනකදී සරසවියෙන් සමුගත්තද